Partia Demokratike e Kosovës ka kërkuar hetim të menjëhershëm për skandalet e Qeverisë. Kjo u kërkua pas mbledhjes së Kryesisë që mbajti për të diskutuar zhvillimet politike në vend.

Kryetari i PDK-së, Memli Krasniqi, ka thënë se publikimet e fundit ku përfshihen “zyrtarë të shumtë shtetërorë në afera keqpërdorimesh”, janë alarmante.

“Partia Demokratike e Kosovës është e përkushtuar që asnjë nga këto afera të mos kalojë pa adresuar, pavarësisht ritmit të shpejtë me të cilin po shfaqen. PDK i bënë thirrje institucioneve përkatëse hetimore dhe gjyqësore që urgjentisht, profesionalisht dhe në mënyrë të paanshme të trajtojnë këto raste, të cilat rikonfirmojnë qartë korrupsionin e përhapur qeveritar, keqpërdorimin e detyrave zyrtare dhe dëmtimin e interesave shtetërore të Kosovës”, thuhet në njoftimin e PDK-së.

PDK-ja përmes një njoftimi në Facebook ka njoftuar më tutje se në mbledhje është diskutuar edhe për “censurën” që thotë se po ndodh në Radiotelevizionin publik, publikimet e mesazheve dhe audioincizimeve nga mediat në vend, etj.

“Afera me ambalazhuesit e ujit zbuloi se Ministria e Mjedisit, Planifikimit Hapësinor dhe Infrastrukturës e ka dëmtuar buxhetin e Kosovës mbi 11 milionë euro. Publikimi i mesazheve të Dejona Mihalit me kryeshefin e KEK-ut Nagip Krasniqi, konfirmoi dy skandale të mëdha të pushtetit aktual: konfirmuan se miku i kryeministrit Kurti, ambasadori Martin Berishaj, ashtu siç ishte paralajmëruar dy vite më parë, është i përfshirë në tregtimin e energjisë elektrike. Konfirmuan edhe përzierjen direkte të Qeverisë në çdo institucion publik nëpërmjet komisares Dejona Mihali. Skandali tjetër i komunikimit të Shefes së Grupit Parlamentar të Vetëvendosjes, Mimoza Kusari – Lila me kryekriminelin serb, Milan Radoiçiq, dëshmoi po ashtu, përfshirjen direkte të pushtetit për t’i lënë veteranët e UÇK-së jashtë ligjit për pagën minimale dhe përpjekjet për kapjen e Gjykatës Kushtetuese”, thuhet në njoftim.