Kryeministri i Kosovës, Albin Kurti është takuar me të mbijetuarën e dhunës seksuale gjatë luftës, Nadia Murad.
Kurti përmes një postimi në Facebook, ka thënë se Murad i ka kthyer vuajtjet në lëvizje globale për drejtësi.
“Nder i veçantë të mirëpres në kryeministri laureaten e Çmimit Nobel për Paqe, Nadia Murad – simbol i guximit dhe qëndresës. Me vendosmëri të pathyeshme, ajo ka kthyer vuajtjet e saj në lëvizje globale për drejtësi kundër përdorimit të dhunës seksuale si armë lufte dhe mjet sistematik të gjenocidit”, ka shkruar Kurti.
Tutje Kurti ka shtuar se Kosova i përkrahë të mbijetuarat e dhunës seksuale gjatë luftës.
“Republika e Kosovës qëndron krah të mbijetuarave të dhunës seksuale gjatë luftës, e përkushtuar për drejtësi dhe mbështetje për secilën prej tyre”, ka shtuar Kurti. /TelegramNews/