Kryetari i Lidhjes Demokratike të Kosovës, Lumir Abdixhiku ka njoftuar për punët që po bëhen në Istog, komunën e udhëhequr nga kryetari Ilir Ferati.
Abdixhiku ka shpërndarë një video nga këto punime, ku mes tjerash ka thënë se atje po ndërtohet një rrugë e re prej afro 20 kilometrash, të cilën ai e ka quajtur “koridor të ri turizmi”.
“Mirëmëngjesi nga Istogu! Nga Bjeshka e Moknës dhe rruga e re prej 19.1 kilometrave që po ndërtohet aty. Një koridor i ri turizmi, një model konkret i punës që vërtetë ka rëndësi!”, tha Abdixhiku.
Sipas të parit të LDK-së, Kosova ka nevojë për projekte e politika të tilla.
“Për këso politika e këso projekte ka nevojë vendi ynë. Temat e tjera të thata, përplot mllef e urrejtje, sharje e përplasje, po mbajnë shtetin e shoqërinë peng – tash e katër vjet. LDK ka tjetër vizion. Atë të zhvillimit, mirëqenies, punëve që lënë shenjë e mbahen në mend! Ky projekt, njëri nga plot të zhvilluar vetëm në nivel lokal, është i tillë!”, tha Abdixhiku.