Mbledhja e Këshillit të Përgjithshëm të LVV-së, punimet e së cilës kanë zgjatur dy ditë, nuk kanë pasur në ambientin hapësinor, flamurin e shtetit dhe as intonimin e himnit.
Këtë praktikë e kultivon vetëm Vetëvendosja, punimet e së cilës kanë marrë kritikat e anëtarit të LDK-së, Muhamet Hamiti, ish ambasador në Britaninë e Madhe.
Muhamet Hamiti nga Lidhja Demokratike e Kosovës, ka komentuar faktin se në organizimin partiak të Lëvizjes Vetëvendosje vikendin që shkoi nuk ka pasur simbole shtetërore.
Në një postim në Facebook Hamiti ka aluduar se qytetarët nuk duhet votuar një parti politike, e cila nuk e do shtetin e Kosovës dhe që nuk i do simbolet e vendit të vet.
“Populli i Kosovës ka luftuar për shtetin e vet të pavarur. S’duhet të lejojë ta përbuzë askush, aq më pak partia në pushtet. Më 9 shkurt 2025 qytetarët e Kosovës do ta kenë mundësinë t’i ndëshkojnë me votë përbuzësit e shtetit të tyre të dashur”, ka thënë ai.
Mbledhjet e Këshillit të Përgjithshëm të cilës do parti në Kosovë, fillojnë me himn dhe nën flamujt e shtetit dhe të kombit, por në këtë segment, bën përjashtim LVV e cila në të gjitha mbledhjet e Këshillit Drejtues, nuk përdor flamuj shtetëror as himnin.
A është ligjërisht obligative përdorimi i simboleve shtetërore në mbledhjet e partive?
Eksperti juridik dhe i sigurisë dhe profesori universitar Blerim Burjani, për Telegram News ka treguar nëse është obligative të përdoren simbolet shtetërore ne mbledhjet e partive.
“Jo, nuk i nënshtrohet ligjit për partitë politike dhe KQZ nuk përzihet në agjendën e brendshme të partive politike, si diçka që mund të merr masa ndëshkuese.Në institucionet e shtetit intonimi i himnit dhe vendosja e flamurit të shtetit është obligative dhe patjetër se duhen respektuar, por kjo bën përjashtim nga rastet e parive politike, sepse partitë politike, janë organizata private. Çështja e vendosjes së simboleve shtetërore, megjithatë flet shumë në kuptimin e përgjithshëm por, kjo mund të komentohet në aspektin politik, sepse në atë juridik nuk çon peshë, sado që kur s’ka simbole shtetërore ambienti e përcjell një mesazh jo të mirë, sikur në rastin konkret”, ka thënë Blerim Burjani, duke folur për mbledhjen e Këshillit të Përgjithshëm të LDK-së./Telegram News