Kryetari i Aleancës për Ardhmërinë e Kosovës, Ramush Haradinaj, ka thënë se Qeveria Kurti me qasjen vet-izoluese e ka përjashtuar Kosovën nga harta e investimeve.
Haradinaj tha se vet-izolimi i Kosovës po sjellë jo vetëm dëme politike por edhe dëme të mëdha ekonomike.
Sipas tij, kjo po reflektohet qartë në largimin masiv të fuqisë punëtore dhe mungesën e vendeve të reja të punës për shkak të mungesës së investimeve.
Në reagimin e tij në Facebook, i pari i AAK-së, ka shtuar se Kosovës i duhet ndryshim urgjent për ta kthyer vendin në rrugën e zhvillimit, pasi siç tha ai ’Kosova ka potencial në inovacion dhe zhvillim, por për të përfituar nga ky potencial, duhet një mentalitet i ri qeverisës’.
“Gjermania ka qenë dhe mbetet një shtyllë e fortë në krijimin dhe ndërtimin e shtetit të Kosovës, si dhe një ndër partnerët tanë kryesorë. Për fat të keq, me qasjen vet-izoluese të Qeverisë së Kosovës, vendi ynë është përjashtuar nga harta e investimeve të jashtme. Këtë e theksoi edhe i dërguari special i Gjermanisë për Ballkanin Perëndimor, z. Manuel Sarrazin, në Forumin e Dytë Ekonomik Gjermano-Kosovar, të organizuar nga Oda Ekonomike Gjermano-Kosovare, ku konfirmoi shqetësimin tonë se shumë investitorë po i drejtohen shteteve të tjera të rajonit. Vet-izolimi i Kosovës po na sjell jo vetëm dëme politike, por edhe dëme të mëdha ekonomike. Kjo po reflektohet qartë në largimin masiv të fuqisë punëtore dhe mungesën e vendeve të reja të punës për shkak të mungesës së investimeve. Kosovës i duhet ndryshim urgjent, për ta kthyer vendin në rrugën e zhvillimit. Ne kemi potencial në inovacion dhe zhvillim, por për të përfituar nga ky potencial, na duhet një mentalitet i ri qeverisës”, ka shkruar Haradinaj.
Ndryshe, gjatë ditës së sotme i dërguari special i Gjermanisë për Ballkanin Perëndimor, Manuel Sarrazin, tha se shumë investitorë po investojnë në Serbi, prandaj sipas tij, edhe Kosova duhet të krijojë parakushte për një gjë të tillë, duke bërë thirrje që të punohet për një treg të përbashkët rajonal që mundëson zhvillim./TelegramNews./
