Kryeministri i Republikës së Kosovës, Albin Kurti takimin e parë bilateral në kuadër të Forumit e zhvilloi me ministren e Punëve të Jashtme të Letonisë, Baiba Braže.
Në njoftimin e lëshuar thuhet se gjatë takimit është diskutuar për mënyrat dhe mundësitë e bashkëpunimit dhe shkëmbimit të përvojave në fushën e mbrojtjes dhe sigurisë.
“Duke shprehur mirënjohjen për përkrahjen e vazhdueshme, kryeministri theksoi rëndësinë e partneritetit bilateral dhe bashkëpunimit të afërt në avancimin e interesave të përbashkëta dhe mbrojtjes, si dhe promovimit të vlerave që Kosova dhe Letonia ndajnë përballë rreziqeve nga regjimet autokratike. Në këtë kontekst, diskutuan për mënyrat dhe mundësitë e bashkëpunimit dhe shkëmbimit të përvojave në fushën e mbrojtjes dhe sigurisë”, thuhet në njoftim.
Më tej, kryeministri e ka njoftuar minitren lidhur me raportet me Serbinë dhe rrezikun që Serbia transmeton te Ballkani Perëndimor.
“Gjithashtu, kryeministri Kurti e njoftoi ministren Braže për zhvillimet në vend, raportet me Serbinë, rreziqet që ajo paraqet për Ballkanin Perëndimor për shkak të lidhjeve të afërta me Rusinë dhe për përfshirjen e saj të drejtpërdrejtë në organizimin dhe ekzekutimin e sulmit terrorist dhe paramilitar të një viti më parë në Banjskë”, thuhet më tej në njoftim. /TelegramNews/