Ndryshe  nga paralajmërimet në Kosovë të kryeministrit  Albin Kurti se Serbia po përgatitet  ta sulmojë Kosovën, Kryeministri ka folur me mburrje në një ligjëratë para studentëve në SHBA, duke thënë se strukturat  paralele serbe në territorin e Kosovës, e kanë humbur  luftën.

Kurti këto komente i bëri në një ligjëratë në Universitetin Yale të shkollës për  çështje Globale, ku tha se serbët  nga Kosova janë çliruar nga  strukturat  kriminale të Serbisë.

Deri më tani Kryeministri Kurti ka  fajësuar vazhdimisht  Serbinë  për organizimin e grupeve paramilitare  në Kosovë për ta sfiduar pushtetin aktual të Qeverisë së tij.

Paraqitja e Kurtit  para studentëve amerikanë ka qenë mbresëlënëse  për nga entuziazmi, duke paraqitur  realitetin në Kosovë me një anatomi tjetër ,krahasuar me atë që e thotë vazhdimisht në Kosovë.

“Serbia ka humbur diçka që nuk e kishte  të veten dhe kur e humb atë që  do ta ketë pasur, mund ta kthejë, por kur e humb atë që nuk e kishte, bëhet e pakthyeshme dhe problem dhe unë besoj se kjo ka ndodhur”, ka thënë Kurti.

Gjendja e sigurisë në Kosovë për shkak të grupeve paramilitare nga Serbia ,nuk ka qenë  më e rrezikshme pas lufte

Para dy ditësh në veri ka ndodhur një shpërthim  që është cilësuar  si më  fuqishmi kohët e fundit me ç’rast, janë shkaktuar dëme të konsiderueshme materiale në vetura dhe në objektet  përreth.

Në veriun e Kosovës vazhdimisht  digjen veturat dhe shtëpitë nga grupet e strukturave paralele dhe ilegale  serbe të cilat e luftojnë  praninë institucionale  të Republikës së Kosovës.

Siguria  në Kosovë  është e brishtë dhe  NATO është më vigjilente se kurrë në kujdestarinë e gjendjes në Kosovë.

Komanda e Forcave të Përbashkëta Aleate në Napoli, “po e monitoron nga afër situatën në Ballkanin Perëndimor, një rajon me rëndësi strategjike për Aleancën”, thotë KFOR-i.

200 trupa shtesë  janë dislokuar më 30 shtator   dhe po aq do të dislokohen edhe në Kosovë, krahas forcave  të mëdha të NATO-s që janë dërguar në Kosovë në kuadër të KFOR-it, është raporti  i bilancit të lëvizjeve ushtarake drejt Kosovës ditët e fundit, që nga  sulmi terrorist në Banjskë.

Aktivistja për  të drejtat  e njeriut në Serbi, Sofija Todoroviq, ka  fajsuar sulmin terrorist në Banjskë,  duke e akuzuar shtetin serb për organizim të sulmit paramilitar.

Gjithashtu  vetë Presidenti i Serbisë Vuçiq  ka deklaruar  se “Serbia po e pret momentin e vet për t’u kthyer në Kosovë”.

Kjo deklaratë është  marrë si shqetësimi më i madh në NATO dhe në SHBA e BE.

Thyerja e  bandave serbe  në Kosovë nuk ka ndodhur për shkak  se ato kanë humbur betejën në Kosovë, por  serbët e Kosovës po përjetojnë një konflikt mes vetes brenda strukturës serbe.

Shoqatat e aktivistëve serbë nga Kosova, për të parën herë të hënën  kanë koordinuar veprimet me  akademinë opozitare në Serbi, duke u distancuar nga Vuçiqi, pasi Kisha Ortodokse Serbe, nuk i pranojë ata  t’i shtrojnë kërkesat e tyre  për problemin e mbijetesës serbe në Kosovë./Telegram News