Shqipëria ka shënuar fitore ndaj Azerbajxhanit me rezultat 3-1 në ndeshjen miqësore të zhvilluar në Hungari.

Sylvinho e nisi lojën me shumicën e lojtarëve që besohet se do të luajë në ndeshjen hapëse të Euro 2024.

Ylber Ramadani pasoi bukur te Nedim Bajrami i cili me një goditje të bukur nga 20 metra arriti të shënojë në portën e Shahrudin Mahammadaliyev.

Kuqezinjtë kishin edhe dy raste në pjesën e parë me Bajramin, por që mesfushori sulmues nuk arriti të shënojë.

Azerët e nisën më mirë pjesën e dytë, me Shqipërinë që ishte paksa e ngathët në mbrojtje, por që porta mbeti e paprekur.

Rey Manaj i futur në pjesën e dytë, rrezikoi bukur në minutën e 66-të, por gjuajtja e tij e fuqishme u ndal nga portieri.

Por në minutën e 81-të, Shqipëria arriti të shënojë golin e dytë, me një aksion shumë të bukur, ku Naser Alijit asitoi, ndërsa Manaj me një gjuajtje të fortë shënoi për 2-0.

Në minutën e 87-të ishte radha për Qazim Laçin, i cili përfitoi nga një asistim i Bajramit për të shënuar për 3-0.

Azerbajxhani arriti të shënojë golin e nderit në minutën 90-të, kur Musa Qurbali shënoi për 3-1.

Shqipëria me dy fitore në miqësore duket gati për të udhëtuar drejt Gjermanisë për Euro 2024, ku në grup është me Kroacinë, Spanjën dhe Italinë.