“Arrestimi i shqiptarëve që kalojnë tranzit nëpër Serbi ,nga Policia dhe BIA serbe, është shqetësues dhe kjo ndodh zakonisht pas ndonjë humbje diplomatike dhe politike që e pëson Serbia në arenën ndërkombëtare…”
Kosova dhe Serbia, përveç mosmarrëveshjeve politike për 25 vjet pas lufte, ndajnë problemin më të rëndë në çështje sigurie, që zakonisht përshkohet me arrestime.
Kosova ka të drejtën sovrane që bazuar në dëshmitarë të gjallë që kanë parë me sytë e vet vrasjet dhe masakrimet e familjarëve të vet, të përballen me vrasësit e viteve 1998-99.
Paralelisht me arrestimet që bën shteti i Republikës së Kosovës përmes organeve të sigurisë publike dhe inteligjente, duke i çuar deri në prokurori dhe gjykatë lëndët për të dyshuarit serbë për krimet , Serbia vepron me hakmarrje pa asnjë provë të besueshme dhe pa dëshmitarë, duke i arrestuar shqiptarët në procese të sistemit të montuar , metoda bashkëpunimi me sistemin rus të montimit dhe akuzimit.
Arrestimi i Tefik Mustafës në pikën kufitare të Merdares, nën akuzën për krime lufte, deri më tani sipas Daçiqit, ka ndodhur se emri i tij është përdorur nga disa dëshmitarë.
Ekspertët e sigurisë e cilësojnë këtë arrestim sikur edhe shumë të tjerë që kanë ndodhur deri më tani, si arrestim për balancim numrash të të arrestuarve serbo-shqiptarë, përderisa Serbia zbaton sistem të montuar arrestimi për shqiptarët, karshi arrestimeve faktografike të serbëve që kanë kryer krime në Kosovë.
Lidhur me arrestimet e shqiptarëve që kalojnë tranzit nëpër Serbi, ish Drejtori i Policisë së Kosovës Rashit Çalaj ,për Telegrami .co ka thënë:
“Rasti i arrestimit të fundit të një shqiptari nga Kosova për krime lufte pa qenë fare pjestar i UÇK-së është revansh ,apo tentim balancimi me arrestimet e sebëve për krime serbe në Kosovë , e që pretendon se ata “nuk” kanë qenë të përfshirë në krime lufte, mirëpo gjoja janë presione që po u bëhen serbëve nga autoritet e Kosovës”, ka thënë ish Drejtori i Policisë së Kosovë dhe deputeti e njohësi më i mirë i proceseve të sigurisë në Kosovë Rashit Çalaj.
Në vitin 2024, përgjatë kalimit nëpër Serbi, janë arrestuar tre shqiptarë për krime lufte.
Sesa e konsideron Serbia të rëndësishëm procesin e arrestimit të shqiptarëve nëpër Serbi, me rastin e arrestimit të Tefik Mustafës , është deklaruar lideri socialist, Ivica Daçiq ,Ministër i Punëve të Brendshme të Serbisë, i cili ka thënë:
“Një person i dyshuar për krime lufte ndaj popullatës civile në Kosovë është arrestuar të shtunën në pikëkalimin kufitar në Merdarë.
Bëhet fjalë për Tefik Mustafën që u arrestua me 1 qershor teksa po kalonte andej…” ka thënë Daçiq për mediet në Serbi.
Serbia ndan 40 milionë euro në vit për agjentura kundër Kosovës
Në emisionin “Pressing” në T7, ish -Kryeinspektori i AKI-së Burim Ramadani , mbrëmë ka thënë se Serbia ndan 40 milionë euro mjete për destabilizimin e Kosovës dhe këto mjete përdoren nga agjenturat serbe për destabilizimin e shtetit të Kosovës.
Ai e ka konfirmuar këtë shifër, duke folur rreth arrestimit të dy agjentëve të dyshuar nga BIA serbe, të cilët kanë qenë të rekrutuar në transmetimin e informacioneve të ndjeshme, vepra nga neni 124 i Kodit Penal të Republikës së Kosovës.
Institucionet e Kosovës në vazhdimësi kanë apeluar qytetarët për shmangie nga kalimi nëpër Serbi,veçmas në momente të ndjeshme politike mes dy shtetesh.
Për arrestimet e shqiptarëve nga Serbia, i njoftuar edhe Departamenti Amerikan i Shtetit
Departamenti Amerikan i Shtetit (DASH) i ka thënë Radios Evropa e Lirë se është në dijeni për arrestimin e një individi nga autoritetet serbe, nën dyshimet për krime lufte të viteve 1990. DASH i ka bërë thirrje Serbisë për proces të drejt ligjor ndaj tij dhe të tjerëve për raste të ngashme.
Gjykata në Beograd, ka marrë vendim për ndalimin e tij në paraburgim prej 30 ditësh, përderisa njohësit e sigurisë kanë thënë se Tefik Mustafa ,nuk ka qenë fare në luftë./Telegrami.co/
