Policia e Kosovës po zhvillon një operacion në katër komuna veriore për të vendosur rend dhe ligjshmëri, duke ndërprerë aktivitetet në pesë objekte të cilat shfrytëzoheshin si komuna ilegale.
Ky aksion është nisur me kërkesë të Ministrisë së Administrimit dhe Pushtetit Lokal.
Policia do të ofrojë informacione shtesë pas përfundimit të operacionit.
“Policia e Kosovës, bazuar në kërkesën e Ministrisë së Administrimit dhe Pushtetit Lokal, në bashkëpunim dhe koordinim me institucionet përkatëse të Kosovës dhe organeve të drejtësisë, është duke zhvilluar një operacion policor në katër komuna në veri të Kosovës. Qëllimi i operacionit policor është vendosja e rendit dhe ligjshmërisë dhe ndërprerja e aktiviteteve në pesë objekte të cilat janë shfrytëzuar në cilësi të komunave ilegale, e të cilat janë në kundërshtim me rendin juridik kushtetues. Operacioni policor është duke vazhduar, ndërsa për informacione shtesë do të informoheni pas përfundimit të operacionit”, thuhet në njoftim.
