Kreu i Partisë së Lirisë, Ilir Meta, ka reaguar për herë të parë pas arrestimit të tij, përmes në postimi në rrjete sociale, ku mohon akuzat ndaj tij.
Në një postim në Facebook tha lufta nis nga sot dhe shtoi se është i bindur për fitoren e tyre në kauzat kombëtare dhe demokratike.
“Po kështu nga sot lufta jonë nis një faqe të re në përballjen pa asnjë kompromis me Narkoshtetin e instaluar brutalisht.Jam i bindur në fitoren e kauzave tona kombëtare dhe demokratike!”, tha ai.
Tutje, Meta shtoi se ndihet më i fortë se kurrë dhe se beson në pafajësinë e tij.
“Armiqtë e kombit tonë dhe demokracisë do u ngrijë e qeshura në buzë! Rrëmbimi im sot në mënyrën më banditeske tregon panikun e regjimit diktatorial nga ballafaqimi me të vërtetat. Ju siguroj se pas njohjes me vendimin e arrestimit tim ndihem më i fortë se kurrë dhe besoj edhe shumë në pafajësinë time të plotë. Ndihem krenar që jam rrëmbyer dhunshëm nga antishqiptarët dhe shqipfolësit vetëm për patriotizmin tim dhe mbrojtjen e interesave kombëtare”, ka shkruar ai.