Kryeministri i Kosovës, Albin Kurti ka pritur në takim Presidentin e Agjencisë së Industrisë së Mbrojtjes së Republikës së Turqisë, Haluk Gorgun.
Në një komunikatë për media thuhet se në takim është diskutuar për ngritjen e kapaciteteve të Forcës së Sigurisë së Kosovës.
“Fillimisht, kryeministri Kurti shprehu falënderimin e tij për bashkëpunimin në fushën e mbrojtjes, veçanërisht sa i përket ngritjes së kapaciteteve të Forcës së Sigurisë së Kosovës. Ai tha se Republika e Kosovës do të vazhdojë blerjen e pajisjeve ushtarake nga Turqia, e cila mbetet një prej partnerëve kryesor të Kosovës”, thuhet në komunikatë.
Tutje në komunikatë thuhet se përgjatë takimit është diskutuar edhe për bashkëpunimin në zhvillimin e industrisë së mbrojtjes.
“Në takim gjithashtu u diskutua rreth mundësive të bashkëpunimit në zhvillimin e industrisë së mbrojtjes, përkatësisht atë të prodhimit të municionit, dhe për kushtet që vendi ynë ofron për investitorë potencialë nga Turqia”, thuhet në komunikatë. /TelegramNews/