Remzi Jahiri është dënuar me 1 vit e gjysmë burgim dhe 25 mijë euro gjobë për veprën penale të fajdës, ndërsa Hilmi Dudi është dënuar me 1 vit burgim dhe 10 mijë euro gjobë për ndihmë në kryerjen e veprës penale të fajdesë.

Aktgjykimi u shpall të premten në Gjykatën Themelore në Prishtinë nga kryetarja e trupit gjykues, gjykatësja Suzana Çerkini me anëtarët Valon Kurtaj dhe Mentor Bajraktari, raporton “Betimi për Drejtësi”.

Gjykata gjithashtu konfiskoi sendet e të akuzuarve sipas vërtetimit mbi sekuestrimin e tyre.

Palët e pakënaqura kanë të drejtë të ankesohen në afat prej 30 ditësh pas pranimit të aktgjykimit në formë të shkruar.

Sipas aktakuzës së Prokurorisë Speciale, të ngritur më 22 prill 2022, Remzi Jahiri akuzohet për shfrytëzimin e gjendjes financiare të rëndë të të dëmtuarve për të fituar para me fajdë, ndërsa Hilmi Dudi akuzohet për ndihmë në këtë veprimtari gjatë periudhës 2018-2019 në restorantin e “Petrol Company” në Fushë-Kosovë.