Kompania Kosovare për Furnizim me Energji Elektrike (KESCO), thotë se është duke e analizuar vendimin për gjobën prej 20 mijë eurosh të shqiptuar ndaj saj.
Zëdhënësja e KESCO-s, Margarita Rashiti ka deklaruar për Telegram News se shqyrtimi do të bëhet brenda 30 ditëve.
“Ne kemi pranuar një vendim nga Agjencia për Informim dhe Privatësi. Jemi duke e analizuar këtë vendim. Ky shqyrtim do të bëhet brenda 30 ditëve të ardhshme, ashtu siç e parashohin edhe dispozitat ligjore”, tha Margarita Rashiti.
Agjencia për Informim dhe Privatësi, thotë se gjoba u shqiptua për shkak se KESCO ka dështuar të zbatojë masat e sigurisë për të mbrojtur të dhënat personale të qytetarëve.
“Gjatë shqyrtimit të ankesave, AIP ka konstatuar se KESCO ka dështuar të zbatojë masat e sigurisë për të mbrojtur të dhënat personale të qytetarëve, duke shkelur kështu detyrimet e saj ligjore”, u tha në vendimin e shqiptuar.
Ndërkaq, Agjencia për Informim dhe Privatësi e ka gjobitur me 20 mijë euro Kompaninë Kosovare për Furnizim me Energji Elektrike (KESCO) për shkelje të privatësisë së konsumatorëve. /TelegramNews.com.
