Takim me emisarin amerikan, Alekasnder Kasanof, ka zhvilluar sot edhe kryetari i LDK-së, Lumir Abdixhiku.
Përgjatë këtij takimi Abdixhiku ka ngritur si shqetësim raportin e dëmtuar të Qeverisë së Kosovës me ShBA-në dhe partnerët e tjerë strategjikë dhe të sigurisë
Kreu i LDK-së i ka thënë zyrtarit të lartë amerikan se nëse LDK do të drejtojë Qeverinë pas zgjedhjeve të 9 shkurtit, do të jetë prioritet riparimi i raporteve me SHBA.
“Kryetari Abdixhiku e siguroi z. Kasanof se, me formimin e qeverisë së re, të drejtuar nga LDK-ja, pas zgjedhjeve të 9 shkurtit, riparimi i këtyre raporteve do të jetë çështje e prioritetit më të lartë. Abdixhiku theksoi se partneriteti strategjik me SHBA-të në fushën e ekonomisë, të energjisë dhe të sigurisë është jetik për LDK-në dhe për Kosovën”, thuhet në njoftim.