Barcelona ka fituar me rezultat të thellë 5-1 në udhëtim ndaj Villarrealit.

Pjesa e parë u karakterizua me shumë raste për gol ,megjithatë blaugranasit ishin më të mirë në finalizim të aksioneve.

Golin e epërsisë Barcelonës ia dha Robert Lewandowski në minutën e 20-të, i cili pranoi një pasim mjaft të bukur nga Pablo Torre për 1-0.

Blaugranasit gjetën golin sërish edhe kësaj radhe me Lewandowskin 15 minuta pasi u shënua i pari, i cili u gjend mirë në zonë për të shënuar për 2-0.

Perez ishte ai që ngushtoi shifrat duke realizuar për 2-1 në minutën e 38-të pas asistimit të Nicolas Pepes.

Në pjesën e dytë Barcelona u tregua sërish më e mirë.

Pablo Torre në minutën e 58-të, me një gjuajtje precize në cepin e portës shënoi për 3-1 ndërsa dy golat e tjerë i shënoi Raphinha fillimisht në minutën e 75-të dhe pastaj në minutën e 84-të.

Pas javës së gjashtë Barcelona mbetet lider në La Liga me 18 pikë, katër më shumë se rivali Real Madridi që ka 14 sosh në pozitën e dytë.