Federico Bernacca, zëvendëskomandanti i misionit të KFOR-it të udhëhequr nga NATO, u takua sot me një delegacion nga partia politike Lista Srpska në selinë e KFOR-it në Camp Film City, Prishtinë.

Delegacioni, i kryesuar nga kryetari i Listës Serbe, Zlatan Elek, u angazhua në diskutime mbi zhvillimet e fundit të sigurisë, veçanërisht në veri të Kosovës.

Gjenerali Bernacca dëgjoi me vëmendje shqetësimet e ngritura nga delegacioni, duke nënvizuar praninë e KFOR-it në mbarë Kosovën. Ai siguroi se KFOR-i është plotësisht i përgatitur për të adresuar çdo çështje të rëndësishme të sigurisë që mund të lindë.

Gjenerali Bernacca ripohoi përkushtimin e palëkundur të KFOR-it për ruajtjen e sigurisë dhe stabilitetit për të gjithë banorët e Kosovës, duke vepruar në mënyrë të paanshme dhe të vazhdueshme brenda kornizës së mandatit të tij të gjatë të OKB-së.

“Ata ndanë pikëpamjet mbi zhvillimet e fundit të sigurisë, duke përfshirë veriun e Kosovës. Gjenerali Bernacca dëgjoi shqetësimet e shprehura nga delegacioni vizitues. Ai theksoi se KFOR-i ka një prani të dukshme dhe fleksibël në mbarë Kosovën dhe është i përgatitur mirë për të adresuar çdo zhvillim të rëndësishëm të sigurisë. Ai përsëriti përkushtimin e palëkundur të misionit për të kontribuar në sigurinë dhe stabilitetin për të gjithë njerëzit që jetojnë në Kosovë, në çdo kohë dhe në mënyrë të paanshme, në përputhje me mandatin e tij të gjatë të OKB-së. Në këtë drejtim, KFOR-i vazhdon të mbështesë plotësisht dialogun e ndërmjetësuar nga BE-ja ndërmjet Beogradit dhe Prishtinës”, thuhet në njoftim.