Grupi Parlamentar i Lëvizjes Vetëvendosje ka mbajtur konferencë për media në përmbyllje të sesionit pranveror të Kuvendit të Republikës së Kosovës.

Shefja e Grupit Parlamentar të VV-së, Mimoza Kusari-Lila, ka thënë se Kuvendi, këtë sesion, ka mbajtur 23 seanca plenare dhe se gjithsej janë miratuar 35 ligje prej të cilave 20 janë marrëveshje ndërkombëtare.

Kusari ka bërë të ditur se gjatë këtij sesioni janë shqyrtuar 12 raporte vjetore, janë miratuar katër raporte dhe shtatë rezoluta për vlerësimin e raporteve të institucioneve.

Ndërkaq Kusari ka shtuar se për herë të parë, është zgjedhur Komisionerja Parlamentare për Forcën e Sigurisë së Kosovës.

“Në Kuvendin e Kosovës janë miratuar shtatë rezuluta një deklaratë e përbashkët, gjashtë rekomandime janë shqyrtuar 12 raporte vjetore, janë miratuar katër raporte, shtatë rezoluta për vlerësimin e raporteve të institucioneve. Në kuadër të punës VV-ja nga 14 komisione funksionale parlamentare, shtatë prej tyre udhëhiqen nga Grupi Paramentar i Vetëvendosjes. Komisionet Parlamentare në total janë mbajtur. 186 mbledhje në të cilat 866 pika janë trajtuar. Gjatë sesionit pranveror është emëruar nga presidentja një gjyqtar në Gjykatën Kushtetuese. Janë emëruar tre anëtarë vendor të Këshillit të Agjencisë për akreditim. Janë emëruar tre anëtarë të Këshillit Prokurorial. Është zgjedhur për herë për parë Komisionerja Parlamentare për Forcën e Sigurisë së Kosovës”, ka thënë Kusari.

Gjatë kësaj konference ka folur edhe deputeti i LVV-së, Adnan Rrustemi, i cili tha se Kuvendi ka thyer rekord të projektligjeve.

“Në çdo përfundim të sesionit e paraqitim punën. Gjatë këtij sesioni janë miratuar 36 ligje nga Kuvendi i Kosovës. Ende pa përfunduar legjislatura ka thyer rekord të projektligjeve. Disa prej projektligjeve janë në Ligjin e Këshillit Prokuroral, për letërnjoftim, Komisionin e Pavarur te Mediave, këto janë disa prej ligjeve ndërsa 28 projektligje të tjera janë në procedurë për të përfunduar projektligjeve”, ka thënë Rrustemi. /EO