Të enjten në Galerinë Komnëtare të Koosvës do t’i jipet lamtumira artistit të shquar kosovarë, Nebih Muriqit.
Sipas njoftimit të GKK-së, katalogu i ekspozitës retrospektive 2016 titullohet “Përtej ankthjit të fantazisë”.
“Me këtë rast, ne i kthehemi punës së tij dhe reflektojmë mbi temat që e bëjnë atë të përjetshëm. I qëndrueshëm sa malet e trevës së Dukagjinit, i qëndrueshëm sa gjuha që flitet në trojet e tij, aq i qëndrueshëm sa miti që i lidh të gjithë, është konflikti ekzistencial brenda njeriut. Muriqi e transmeton këtë gjendje universale me Kosovën si sfond, pëlhura si një fushë beteje. Ka një muzikalitet në pikturat e tij, një tension poetik midis ngjyrave të kuqe dhe blu. E mjegullt, e fragmentuar, dinamike, e ndërtuar deri në kulm, herë kontradiktore dhe herë të tjera harmonike, vetë jeta rrjedh nga pikturat e tij. Ngjyra e kaltër ka preokupuar artistët për mijëvjeçarë. Çfarë ka kjo nuancë mistike që e ka mahnitur edhe Nebih Muriqin me dekada? Një citim nga libri i Maggie Nelson “Bluets” është i përshtatshëm pasi ne nderojmë një artist të madh, puna e të cilit ishte thellësisht emocionale dhe ekzistenciale, “Pse është qielli i kaltër? – Një pyetje mjaft e drejtë, dhe për të cilën e kam mësuar përgjigjen disa herë. Megjithatë, sa herë që përpiqem t’ia shpjegoj dikujt ose t’ia kujtoj vetes, më humbet përgjigja. Tani më pëlqen ta kujtoj vetëm pyetjen, pasi më kujton se mendja ime është në thelb një sitë, se unë jam i vdekshëm.” Nebih Muriqi ka lindur në vitin 1943 në Novosellë të Pejës. Në vitin 1962 mbaroi shkollën e mesme të artit në Pejë. Në vitin 1969 diplomoi në Akademinë e Arteve Aplikative, në Beograd, kurse magjistori në vitin 1973. Në vitin 1975 u zgjodh për të dhënë mësim në Fakultetin e Arteve në Prishtinë, ku u pensionua si profesor i rregullt. Muriqi ka ushtruar detyrën edhe si drejtor i Galerisë Kombëtare të Kosovës nga viti 1988 deri në vitin 1992. Imazhet nga katalogu i ekspozitës retrospektive 2016 në GKK, e titulluar “Përtej ankthit të fantazisë””, thuhet në njoftim.
