Paneli Zgjedhor për Ankesa dhe Parashtresa (PZAP) ka gjobitur Lëvizjen Vetëvendosje, në dy raste të ndara me 11 mijë euro, ankesa këto nga Partia Demokratike e Kosovës pranë këtij institucioni.
Rasti i parë i njërës nga gjobat, 5 mijë euro, është nga ankesa e paraqitur nga Partia Demokratike e Kosovës të premten e 24 janarit pranë PZAP-së për LVV-në, deputeten Arbena Reshitaj e cila në llogarinë e saj në Facebook kishte publikuar një fotografi në një nga tubimet e këtij subjekti politik, e që në të ishte e vendosur parulla ku shkruante “Prokuroria e Kosovës e kapur nga hajnat. Qeveria Kurti i çoi në Gjykata 250 lëndë, atdheu në rrezik, mërgata voton LVV”.
PZAP e ka vlerësuar si të bazuar ankesën e PDK-së, dhe partia në pushtet detyrohet që brenda 15 ditësh të paguaj gjobën prej 5 mijë eurove.
“Shpërndarja e një postimi të tillë, ku në qendër të kësaj foto shihet haptazi parulla me përbajtje përçmuese, urrejtëse, denigruese dhe ofenduese nga kandidatje për deputete e VV-së, Albena Reshitaj, përbën shkelje të rregullave zgjedhore, mbi të cilat duhet të organizohet dhe të zhvillohet fushata zgjedhore”, thuhet në arsyetimin e PZAP-së.
Edhe ankesa tjetër e PDK-së ndaj VV-së, e vlerësuar si e bazuar nga PZAP-ja, ka të bëjë me deputetin Haxhi Avdyli i cili ka publikuar një video në Facebook, me tekst shoqërues, e realizuar në Klinikën e Neurologjisë.
Në arsyetimin e PZAP-së, thuhet se Avdyli ka promovuar numrin e tij kandidues dhe ka shfrytëzuar këto ambiente me qëllim të përfitimit të votave.
PZAP në këtë rast ka gjobitur me 6 mijë euro subjektin politik, Lëvizja Vetëvendosje.
Këtu futen edhe kandidatët tjerë, Albena Reshitaj, Agon Batusha, Besim Muzaqi, ku që të tre kanë publikuar pamje nga ambientet e Kuvendit të Kosovës.
