Masat e ajrit të ngrohtë mbi Afrikën e Veriut dhe Mesdheun qendror po bëjnë rrugën e tyre drejt lindjes, duke bërë që temperaturat të rriten në 45 gradë Celsius në Greqi dhe Turqi në disa vende nga sot deri të premten.

Temperaturat më të larta priten të mërkurën dhe të enjten dhe duhet të ulen gjatë fundjavës, parashikon shërbimi meteorologjik grek.

Nga e marta, shkollat në pjesë të vendit ose do të mbyllen në 11:30 të mëngjesit ose do të mbeten krejtësisht të mbyllura në qoftë se komunat lokale vendosin se nxehtësia është shumë e fortë.

Ministria e punës e Greqisë u ka kërkuar njerëzve në sektorët publikë dhe privatë të punojnë nga shtëpia nëse është e mundur.

Në Greqi hapen strehime me ajër të kondicionuar

Për turistët e shumtë që ndodhen aktualisht në Athinë, Kryqi i Kuq Grek ka ngritur stalla në sheshin qendror Sintagma dhe në Akropol, ku personeli shpërndan ujë falas.

Njerëzit këshillohen të shmangin daljen jashtë në mesditën e nxehtë, të pinë shumë ujë, të shmangin alkoolin, të mos hanë shumë dhe të shmangin ushtrimet intensive në natyrë.

Shumë qytete dhe komuna në Greqi po hapin ndërtesa publike, me ajër të kondicionuar ku të pastrehët, nevojtarët dhe njerëzit që nuk kanë ajër të kondicionuar në shtëpi mund të kërkojnë strehim.

Shërbimi meteorologjik i Turqisë paralajmëroi gjithashtu për një valë nxehtësie, e cila do të godasë në veçanti perëndimin e vendit, ku priten temperatura rreth 45 gradë Celsius.

Këshillohet të shmanget qëndrimi jashtë nga ora 11 e mëngjesit deri në orën 16:00, veçanërisht për të moshuarit, fëmijët dhe të sëmurët kronik.