Presidenti i zgjedhur rishtas i SHBA-së Donald Trump të martën ndau një hartë në platformën e tij Truth Social, duke treguar Kanadanë si pjesë e SHBA-së.

Postimi ndjek deklaratat e tij të përsëritura se Kanada është bërë “shteti i 51-të” që nga fitorja e tij e zgjedhjeve në nëntor.

“Shumë njerëz në Kanada pëlqejnë të jenë shteti i 51-të. Shtetet e Bashkuara nuk mund të vuajnë më deficitet dhe subvencionet e mëdha tregtare që Kanada duhet të mbijetojë. Justin Trudeau e dinte këtë dhe dha dorëheqjen”, shkroi Trump pas dorëheqjes së kryeministrit kanadez.

Trump shkoi më tej në deklaratën e tij, duke propozuar bashkimin e SHBA dhe Kanadasë. Ai argumentoi se një veprim i tillë do të largonte pengesat tregtare, do të zvogëlonte taksat për kanadezët dhe do të forconte sigurinë e tyre.

“Nëse Kanada do të shkrihej me SHBA-në, nuk do të kishte tarifa, taksat do të ishin dukshëm më të ulëta dhe ato do të ishin plotësisht të sigurta nga kërcënimi i anijeve ruse dhe kineze që vazhdimisht e rrethojnë. Çfarë kombi i madh do të ishte!” tha Trump.

Trudeau hodhi poshtë propozimin e diskutueshëm të Trump, duke thënë me vendosmëri se “nuk ka asnjë shans që Kanada të bëhet pjesë e Shteteve të Bashkuara”.

Ministrja e Jashtme kanadeze Melanie Joly kritikoi gjithashtu deklaratat e Trump, duke i përshkruar ato si një pasqyrim të “mungesës së plotë të mirëkuptimit” të Kanadasë.

“Ekonomia jonë është e fortë. Njerëzit tanë janë të fortë. Asnjëherë nuk do të gjunjëzohemi para kërcënimeve, “tha ajo në Twitter.