Ministri i Punëve të Brendshme, Xhelal Sveçla ka vizituar policët e lënduar, pas aksidentit në veri të vendit.

Ai ka thënë se gjendja e tyre fatmirësisht po përmirësohet, çka ka falënderuar mjekët për kujdesin dhe trajtimin e nevojshëm për rikuperimin e tyre.

Postimi i tij:

Sapo mbërrita mbrëmë nga Kroacia vizitova në QKUK tre policët tanë që po marrin trajtim mjekësor. U takova po ashtu edhe me familjarët e kolegët e tyre.

Me Ministrin e Shëndetësisë Arben Vitia takuam mjekët që po përkujdesen për shëndetin dhe trajtimin adekuat. Ata na njoftuan e siguruan se janë duke i trajtuar policët me kujdesin më të lartë profesional.

Teksa gjendja e tyre fatmirësisht po përmirësohet, falënderoj përzemërsisht të gjithë mjekët të cilët nga mbrëmë kanë bërë të pamundurën që policët tanë të kenë kujdesin dhe trajtimin e nevojshëm për rikuperimin e tyre.

Shkaqet e aksidentit po hetohen por jam shumë i lumtur që djemtë tanë janë jashtë rrezikut për jetë.

Iu uroj të kthehen sa më shpejt në detyrë, në shërbim të qytetarëve e vendit tonë.