Reagimet ndërkombëtare pas mbylljes së komunave paralele serbe në veri janë shqetësuese për dy partitë opozitare, LDK dhe AAK.

Ato kërkojnë koordinim me aleatët perëndimorë, megjithëse pranojnë domosdoshmërinë e shuarjes së strukturave ilegale serbe. Ndërkohë, partia në pushtet, Lëvizja Vetëvendosje, e cilëson reagimin e aleatëve si të padrejtë dhe thekson se veprimet janë në përputhje me ligjin dhe rendin.

Deputetja e LDK-së, Rrezarta Krasniqi, thotë se kryeministri Kurti dhe ministrat e tij janë të izoluar nga aleatët ndërkombëtarë dhe se masat ndëshkuese të BE-së janë alarm për prishjen e raporteve.

Deputetja e AAK-së, Time Kadrijaj, thekson se Kosova ka humbur përkrahjen e aleatëve dhe ka pësuar humbje financiare si pasojë e veprimeve të qeverisë.

Nga ana tjetër, deputeti i LVV-së, Enver Dugolli, e quan të padrejtë reagimin e aleatëve, duke e mbrojtur veprimin e qeverisë si përputhje me ligjin dhe duke theksuar se raportet me aleatët nuk janë përkeqësuar.

Pas mbylljes së strukturave, SHBA dhe BE e kanë cilësuar veprimin e Kosovës si “provokues dhe të njëanshëm”.