Ministri i Financave, Hekuran Murati dhe kryeshefi i Korporatës Energjetike të Kosovës, Bekir Gërguri kanë nënshkruar dy marrëveshje me vlerë mbi 60 milionë euro për financimin e projektit të energjisë solare I (Solar4Kosovo).

Në njoftimin e postuar në Facebook nga Ministria e Financave thuhet se ky projekt parasheh ndërtimin e një impianti fotovoltaik diellor me kapacitet të instaluar deri në 100 MW, që do të prodhojë rreth 152 GWh energji në vit.

“Synimi kryesor është rritja e prodhimit të energjisë nga burimet e ripërtëritshme dhe ulja e ndikimit në ambient nga prodhimi i energjisë elektrike në Kosovë”, thuhet në njoftim.

Pjesë e projektit është instalimi i paneleve solare në fushat e ish-deponisë së hirit të KEK-ut, afër termocentraleve.