Konkurrentja e Big Brother VIP Kosova, Gresa, ka bërë një rrëfim të rëndësishëm dhe të hidhur në lidhje me një ngjarje të pahijshme që i ka ndodhur gjatë karrierës së saj.

Ajo ka treguar se një regjisori i ka kërkuar favore seksuale për t’i ofruar një rol, një ngjarje që ka shkaktuar debate të forta mes saj, Xuxit dhe Vullnetit, gjatë një bisede në program.

Gresa ka shpjeguar se, pas një takimi me regjisorin, ky i fundit i kishte bërë një koment të papërshtatshëm dhe i kishte sugjeruar se mund të kishte mundësi për një rol nëse ata do të kishin një marrëdhënie më personale, duke nënkuptuar kërkesa për favore seksuale për të siguruar punën.

Ajo e ka konsideruar këtë ngjarje si një shfrytëzim të papranueshëm dhe ka vendosur të ndajë këtë përvojë për të ngritur vetëdijen për një fenomen të tillë.

Milaim Zeka, opinionist dhe i ftuar në program, i ka dalë në mbrojtje Gresës për guximin e saj që të flasë hapur për një çështje kaq të ndjeshme dhe të dhimbshme.

Ai ka theksuar se ky nuk është një rast i izoluar, por një fenomen më i gjerë që ndodh shpesh në shumë fusha të jetës profesionale.

“Kjo është historia më e bukur që ke pas guximin me tregu. Historia më trishtuese që e di Xuxi, Vullneti dhe të gjithë ne dhe publiku. Jo vetëm favore për role, por favore për punë, studentëve nga profesorët, dhe kolegëve gazetarë për vendin e punës. E ty bravo që e ke thënë këtë fenomen të shëmtuar”, ka thënë Zeka.

Ai ka shprehur keqardhjen për reagimin e disa kolegëve të tij, të cilët, në vend që të mbështesin Gresën dhe të dëgjojnë historinë e saj, janë tallur me të. Zeka ka nënvizuar rëndësinë e denoncimit të rasteve të shfrytëzimit dhe keqtrajtimit në mjedisin profesional, duke u bërë thirrje të gjithë individëve që të qëndrojnë të fortë dhe të flasin për çdo abuzim që mund të ndodhë.