Kryeministri i Kosovës, Albin Kurti, ka bërë homazhe pranë Lapidarit të Dëshmorëve të familjes Lleshi në fshatin Vraniq të Komunës së Gjakovës, në 26-vjetorin e rënies heroike të Kolë dhe Mark Lleshit.
“Jemi këtu për të bërë homazhe, për të nderuar, për të kujtuar dhe përkujtuar veprën heroike të dëshmorëve të kësaj familje, e cila bëri krejt çfarë mundi e diti dhe dha krejt çfarë pati për çlirimin e vendit tonë dhe për pavarësi e për bashkim”, u shpreh kryeministri Kurti.
Ai shprehu mirënjohjen e tij të thellë, falënderimin e pamasë për këtë vetëmohim, flijim e sakrificë, të familjes Lleshi, që katër dëshmorë i ka nga lufta e fundit.
Sipas tij edhe në luftërat e mëhershme, gjithmonë ka pasur bijë e bija, të cilët me armë në dorë i kanë mbrojtur trojet e tyre stërgjyshore.
Ndërkaq Kurtin e shoqëronin ministrat Rozeta Hajdari, Ejup Maqedonci dhe me zëvendësministrat, Vigan Qorrollin, Mevludin Sinanin dhe aktivistë nga Lëvizja e kolegë nga Qeveria e Kuvendi.
