Robin Brooks, një anëtar i lartë në programin e Ekonomisë dhe Zhvillimit Global në Institutin Brookings, ka pasqyruar të dhëna që tregojnë për eksportet e Serbisë në Kirgistan, e të cilat përfundojnë në Rusi.
“Eksportet e Serbisë në Kirgistan janë rritur çmendurisht me 6200% në krahasim me para se Rusia të pushtonte Ukrainën (e zeza). Sigurisht, asnjë nga këto mallra në fakt nuk përfundon në Kirgistan. Të dhënat e importit të Kirgistanit nga Serbia tregojnë saktësisht se ASGJË s’vjen nga Serbia (blu). Këto eksporte shkojnë direkt në Rusi…”.
Në anën tjetër, Kirgistani, një vend i Azisë Qendrore, mban lidhje të forta me Moskën. Madje, presidenti rus Vladimir Putin kishte udhëtuar në tetor të 2023-ës për në Kirgistan, i cili edhe ishte udhëtimi i tij i parë jashtë vendit që kur Gjykata Ndërkombëtare Penale (ICC) lëshoi një urdhërarresti për të në mars.
Në këtë takim vjet me presidentin e Kirgistanit, Sadyr Japarov, Putin kishte nënvizuar rëndësinë e Rusisë si investitori më i madh në ekonominë Kirgistan dhe tha se të dyja palët do të zhvillonin më tej bashkëpunimin.
“Vendi ynë është furnizuesi kryesor i produkteve të naftës në Kirgistan, ne furnizojmë plotësisht konsumatorët kirgistanë me benzinë dhe naftë”, tha Putin në një konferencë.
“Ne e vlerësojmë shumë partneritetin strategjik Kirgistan-Rus dhe marrëdhëniet tona si aleatë”, kishte thënë më pas Japarov.
Shtetet e Bashkuara kishin vendosur sanksione ndaj katër kompanive të Kirgistanit në korrik të vitit të kaluar për rieksportin e komponentëve elektronikë dhe teknologjive të tjera në Rusi.
