Një instruktor i një autoshkolle në Mitrovicë është arrestuar pasi ka pranuar ryshfet nga një kandidat, i cili është arrestuar po ashtu.

Siç bën të ditur Policia e Kosovës, instruktori i autoshkollës ka pranuar nga i dyshuari tjetër para me qëllim të lehtësimit të procedurës për kalimin e testit me shkrim për kategorinë B të vozitjes.

Në cilësi të provave materiale janë sekuestruar 600 euro para të gatshme dhe dy telefona celularë.

Të dyshuarit janë dërguar në mbajtje.

Njoftimi i policisë:

DHËNIE /MARRJE E RYSHFETIT

Mitrovicë / 15.01.2025. Janë arrestuar dy të dyshuar meshkuj kosovar për shkak të dyshimit se njëri prej tyre në cilësi të instruktorit të vozitjes në një autoshkollë private ka pranuar nga i dyshuari tjetër para me qëllim të lehtësimit të procedurës për kalimin e testit me shkrim për kategorinë B të vozitjes. Në cilësi të provave materiale janë sekuestruar 600€ (6X100) para të gatshme dhe dy telefona celularë. Me urdhër të prokurorit të dyshuarit pas intervistimit janë dërguar në mbajtje.