Muajin e kaluar, drejtori i CIA-s, William Burns, vizitoi Bosnjën dhe Hercegovinën, Serbinë dhe Kosovën për të adresuar tensionet në Ballkanin Perëndimor, një rajon me potencial të lartë për konflikte.
Vizita e Burns është vlerësuar si një nga më të rëndësishmet në 15 vitet e fundit, duke shënjuar “vijat e kuqe” për liderët politikë të rajonit.
Në Bosnjë dhe Hercegovinë, Burns u takua me anëtarët e Presidencës, duke dërguar një mesazh të fortë për Milorad Dodik, liderin e Republikës Srpska, i cili është i njohur për politikat e tij të ndarjes dhe lidhjet e ngushta me Rusinë. Dodik kishte kërcënuar ndarjen e Republikës Srpska nga Bosnja dhe Hercegovina dhe kishte promovuar gjuhën e urrejtjes ndaj boshnjakëve, si dhe mohimin e gjenocidit të Srebrenicës. Pas vizitës së Burns, Dodik u shpreh se nuk kishte planifikuar të ndante entitetin e tij.
Vizita në Serbi ishte më e rezervuar, por kishte për qëllim të adresonte rolin e Serbisë si qendër për aktivitetet e inteligjencës ruse dhe marrëdhëniet në rritje me Kinën. Ndërsa vizita në Kosovë ka ndodhur në një periudhë të tensionuar mes qeverisë amerikane dhe Kosovës, ku SHBA-ja ka shprehur shqetësime për veprimet njëanshme të qeverisë së Kosovës. Ambasadori amerikan në Prishtinë, Jeff Hovenier, ka kërkuar që kryeministri Albin Kurti të respektojë kërkesat ndërkombëtare dhe të shmangë veprimet që mund të përkeqësojnë situatën.
Në të njëjtën kohë, janë ngritur shqetësime për mundësinë e zhvillimeve të tjera problematike, si ndërtimi i banesave për serbët e Kosovës në rajonin e Sanxhakut në Serbi, i cili mund të jetë një plan për të justifikuar akuzat për spastrim etnik dhe mund të çojë në pasoja të rënda ndërkombëtare për Kosovën.
Këto ngjarje ndodhin pak ditë përpara përvjetorit të sulmit terrorist të 24 shtatorit në Banjskë, ku Prokuroria Speciale e Kosovës ka ngritur aktakuzë për 45 persona, përfshirë Milan Radoiçiqin. BE-ja e mirëpriti ngritjen e aktakuzës dhe kërkoi që Serbia të sjellë para drejtësisë autorët e sulmeve. Ndërkohë, Serbia ende nuk ka ndërmarrë hapa konkretë për të adresuar këtë çështje.
