Dronët ukrainas goditën një depo të madhe ushtarake në një qytezë thellë brenda Rusisë gjatë natës, duke shkaktuar një zjarr të madh e duke e nxitur evakuimin e disa banorëve lokalë, thanë të mërkurën një zyrtar ukrainas dhe raportet ruse të lajmeve.
Ndërkohë, një diplomat i lartë amerikan tha se plani i njoftuar rishtazi – por ende konfidencial – i presidentit ukrainas, Volodymyr Zelensky, për ta fituar luftën “mund të funksionojë” dhe ta ndihmojë përfundimin e konfliktit, raporton agjencia “Associated Press”.
Ukraina pretendoi se me këtë sulm u shkatërruan depo ushtarake ruse në Toropets, qytezë në rajonin Tver të Rusisë, rreth 380 kilometra në veriperëndim të Moskës dhe rreth 500 kilometra larg kufirit me Ukrainën.
Sulmi u krye nga Shërbimi i Sigurisë i Ukrainës, bashkë me Forcat e Operacioneve Speciale dhe të Inteligjencës, i tha agjencisë “Associated Press” një zyrtar ukrainas i sigurisë, duke folur në kushte anonimiteti.
Sipas zyrtarit, në depo kishte raketa të tipave “Iskander” dhe “Tochka-U”, si dhe bomba rrëshqitëse e predha artilerie. Ai tha se objekti u kaplua nga zjarri gjatë sulmit dhe se flaka po përhapej në një zonë gjashtë kilometra të gjerë.
Agjencia shtetërore ruse e lajmeve, “RIA Novosti”, citoi autoritete rajonale të kenë thënë se sistemet e mbrojtjes ajrore po punonin për të sprapsur një “sulm masiv me dronë” ndaj qytezës Toropets, që ka rreth 11 mijë banorë. E njëjta agjenci gjithashtu raportoi për një zjarr dhe për evakuimin e disa banorëve.
Nuk pati të dhëna të menjëhershme nëse sulmet kishin shkaktuar ndonjë viktimë.
Sulmet e suksesshme ukrainase ndaj caqeve thellë brenda Rusisë janë bërë më të zakonshme, përderisa Kievi e ka zhvilluar tekonologjinë e vet të dronëve.
