Prokuroria Speciale ka ngritur aktakuzë ndaj 10 personave, nëntë prej të cilëve akuzohen për organizim të skemave piramidale dhe bixhozit të paligjshëm, ndërkohë një tjetër për posedim të paautorizuar të armëve.
Kështu ka njoftuar Prokuroria Speciale e Kosovës.
“Prokuroria Speciale e Republikës së Kosovës ka ngritur aktakuzë në Gjykatën Themelore në Prishtinë – Departamentin Special, kundër dhjetë (10) personave, ku nëntë (9) prej tyre A.N, M.B, SH.K, E.D, R.D, F.M, B.G, R.M dhe M. B janë akuzuar për shkak të veprës penale “Organizimi i skemave piramidale dhe bixhozit të paligjshëm nga neni 294 par. 2 lidhur me nenin 31 i KPRK-së, ndërsa kundër një (1) të akuzuari është paraqitur aktakuzë në drejtim të veprës penale “Mbajtja në pronësi, kontroll ose posedim të paautorizuar të armëve”, nga neni 366 par.1 i KPRK-së”, thuhet në komunikatë.
