Policia e Kosovës ka bërë apel për opionin publik lidhur më shpërndarjen e e-mail-e të ndryshme me dokumente false që po bëhen pa autorizimin e Policisë.

Në komunikatën e lëshuar për media thuhet se ato dokumente të shpërndara po pretendohet se i përkasin Policisë e Kosovës dhe se po lëshohen nga zartarë të lartë brenda Policisë.

“Policia e Kosovës (PK), përmes kësaj komunikate zyrtare, njofton opinionin publik lidhur me qarkullimin dhe shpërndarjen nëpër e-mail-e të ndryshme, të disa informacioneve/dokumenteve false, që kinse i përkasin Policisë së Kosovës dhe kinse janë lëshuar nga zyrtarë të lartë brenda Policisë së Kosovës”, thuhet në komunikatë.

Tutje në komunikatë thuhet se ato dokumente po emërtohen si “KUJDES: URDHËRI ZYRTARE GJYKATARE”, transmeton Telegram News.

“Këto informacione të dërguara nga kinse zyrtarë të lartë të PK-së, të emërtuar si “KUJDES: URDHËRI ZYRTARE GJYKATARE”, kinse të lëshuara nga “Byroja Qendrore e Hetimit, Qendra Kompjuterike e Krimit Kibernetik, Departamenti i Kërkimit dhe Analizës dhe Drejtoria e Policisë, Republika e Kosovës”, e që kinse janë lëshuar me qëllim të njoftimit të palës së caktuar për urdhër gjykate, nuk janë dokumente zyrtare të Policisë së Kosovës, e aq më pak të lëshuara nga zyrtarë të lartë brenda PK-së, por janë e-mail-e/dokumente të falsifikuara për përdorim me qëllime të caktuara”, thuhet tutje në njoftim.

Ndërkaq kjo vepër cilësohet si vepër penale dge se Policia ka filluar me hetime intensive.

“Policia e Kosovës si institucion i zbatimit të ligjit, në bashkëpunim dhe koordinim me organet e drejtësisë, pas sigurimit të informacioneve rreth qarkullimit të e-mail-eve/dokumenteve të tilla, ka filluar hetimet intensive, duke angazhuar njësitet kompetente policore, me qëllim të hetimit, verifikimit dhe zbulimit të kryerësve të kësaj vepre penale”, ka shtuar Policia e Kosovës. /TelegramNews/