Shefi i Grupit Parlamentar të AAK-së, Besnik Tahiri, e ka kritikuar Qeverinë e Kosovës për heshtje ndaj akteve të fundit kriminale në Prishtinë. Ai ka thënë se ekzekutivi nuk e ka thënë asnjë fjalë për vrasjen dhe plagosjet e fundit në kryeqytet.
Në profilin e tij në “Facebook”, Tahiri ka shkruar se heshtja e qeverisë për këto raste është e turpshme.
“Pasiguria në kryeqytet është bërë brenga kryesore për qytetarët e Prishtinës. Mbrëmë, një vrasje e një djali të ri dhe pesë plagosje. Sot, një therrje e një djaloshi në një shkollë fillore. Si more spo ju vjen turp, asnjë reagim apo asnjë qëndrim nga qeveria e Kosovës, që na lodhi me popullizëm e kurr su morën me tema që janë brengë serioze. Apo, aty ku nuk ka votë e popullizëm nuk flisni. A e shihni sa është rritur krimi nën udhëheqjen tuaj. Pak banorë jemi me pas këtë nivel të krimit. Turp!”, ka shkruar Tahiri
