Parlamenti i Koresë së Jugut të shtunën ka votuar për ta fajësuar presidentin e vendit, Yoon Suk Yeol, duke e pezulluar nga detyra zyrtare.
Kjo, siç raporton “REL”, vjen pas tentimit të tij për të shpallur gjendje lufte.
Parlamenti ka votuar më 204 vota për fajësimin e tij dhe 85 kundër. Fuqia e tij presidenciale do të pezullohet, derisa kopja e dokumentit i dorëzohet vetë atij dhe Gjykatës Kushtetuese.
Gjykata më pas, ka 180 ditë afat për të vendosur nëse duhet shkarkuar Yoon, apo të rikthehet në pushtet.
Një vendim i tillë erdhi pas përpjekjës së tij për të vendosur ligjin për gjendjen e jashtëzakonshme gjatë javës së kaluar, veprim që tronditi opinionin.
Shpallja e gjendjes ushtarake nga presidenti i Koresë së Jugut ka nxitur reagime dhe protesta në vend si dhe shqetësim në mesin e aleatëve ndërkombëtarë të Seulit.
Ministri i Mbrojtjes i Koresë së Jugut, i cili e kishte rekomanduar shpalljen e gjendjes ushtarake, tashmë ka dhënë dorëheqje.
Shtetet e Bashkuara kanë 28 mijë e 500 ushtarë të vendosur në Korenë e Jugut si trashëgimi e Luftës Koreane në periudhën 1950 – 1953.
Komandanti i forcave amerikane në Kore, Gjeneral Paul LaCamera, i paralajmëroi trupat amerikane përmes një deklarate të mërkurën që të qëndronin vigjilente, t’i shmangnin zonat me protesta dhe t’u tregonin eprorëve të tyre për planet e udhëtimit në rast se ndodh “diçka e papritur”.
