Pas përfundimit të semestrit verorë studentët e komunave tjera që studiojnë në Prishtinë ja mësyn stacionit të autobusëve për t’u kthyer në shtëpitë e tyre.
Por që kjo kategori po ankohet se nuk ka zbritje të biletave të udhëtimit.
Një studente e cila udhëton me autobus të linjës Prishtinë – Istog ka thënë për TelegramNews.com se pavarësisht se në disa linja të autobusëve të qyteteve tjera ka zbritje për studentë, tek linja Prishtinë – Istog një gjë e tillë nuk po mirret parasysh.
E njëjta tha se ajo paguan çmimin e rregull të biletës së udhëtimit për një drejtim që në total është 5 euro.
“Për neve studentët nuk ka zbritje në bileta, qysh ka në disa komuna tjera. Unë kam shoqe prej komunave tjera që udhëtojnë, ato e paguajnë biletën me zbritje, në jo. Ne paguajmë njejtë 5 euro si tjerët”, tha ajo.
Redaksia e TelegramNews ka kontaktuar njërën prej agjencioneve të linjës Prishtinë – Istog për të pyetur arsyen se pse për këtë kategori nuk ka zbritje në çmim, e të njëjtit kanë thënë se “nuk ka arsye”.
“Çmimi i biletave nuk ndryshon për asnjë shtresë as studentore dhe as të moshuar. Nuk ka arsye”.
Madje agjencioni u “arsyetua” se çmimi nuk ka ndryshuar tash e sa kohë.
“Të gjitha agjensionet të Istogut e kanë këtë çmim dhe nuk ka ndryshuar asnjëherë tash e sa kohë”.
Tutje Telegrami ka kontaktuar edhe zyrtaren për informim të Stacionit të Autobusëve në Prishtinë, por që sipas tyre, çmimi për biletë vendoset nga vet agjensioni dhe se përgjegjësia është e vet transportuesit.
“Çmimet vendosen vetë nga agjensionet dhe se përgjegjësia është e tëra e transportuesit. Shoqata e transportuesve është ajo që i kontrollon dhe dakordohet me transportuesit sa i përket çmimeve të biletave të autobusëve”, thanë nga Stacioni i Autobusëve.
Kujtojme që Ministria e Infrastrukturës kishte marrë vendim që të përgjysmohen biletat për disa kategori të caktuar shoqërore.
Ku në bazë të vendimit, kategoritë që përfitonin nga përgjysmimi i çmimit të biletës së autobusëve ishin, fëmijët, studentët, invalidët e luftës, invalidët e punës dhe pensionistët. Por që një vendim i tillë ishte shfuqizuar./V.H
