Kryeministri i Kosovës, Albin Kurti, mori pjesë në një ngjarje për shënimin e 25-vjetorit të misionit të OSBE-së në Kosovë, ku u bë fjalë për rolin e rëndësishëm të misionit në historinë e vendit.

Kurti theksoi rëndësinë e misionit të OSBE-së, duke përmendur veçanërisht kontributin e ambasadorit William Walker dhe misionit verifikues që ai drejtonte para fillimit të misionit të OSBE-së në Kosovë.

Ai nënvizoi se ky mision ishte dëshmitar i masakrës së Reçakut, ku u vranë 45 civilë, një nga më shumë se 400 masakra të kryera nga aparati shtetëror serb në Kosovë. Kurti po ashtu falënderoi OSBE-në për ndihmën në ngritjen e demokracisë në Kosovë dhe për investimin në sigurinë dhe të drejtat e njeriut.

Gjatë ngjarjes, Kurti shprehu mirënjohje për profesionalizmin, kujdesin dhe mbështetjen e OSBE-së në të drejtat e njeriut, sundimin e ligjit, demokracinë dhe prosperitetin e popullit dhe shoqërisë së Kosovës.