Apeli i GJKKO-së ka lënë në fuqi masën e sigurisë arrest me burg për 10 anëtarët e grupit kriminal për trafikun e kokainë në lëkurën e bagëtive.
Apeli nuk ka pranuar ankimin për një masë më të butë sigurie, ndërsa mes të arrestuarve në operacionin e 15 nëntorit ishin dhe 3 të huaj, dy venezuelas dhe një kolumbian, që dyshohet se do të bënin ndarjen e kokainës nga lëkura e bagëtive.
Ndërkohë, kokaina e shkrirë në lëkurë gjedhi, që u kap brenda laboratorit të sofistikuar të drogës në Qerekë të Fushë-Krujës, i është nënshtruar analizave që do të përcaktojnë saktësisht se sa kilogram lëndë narkotike do të ekstraktoheshin nga ndarja e 48 tonëve lëkurë gjedhi.
Një operacion i përbashkët mes autoriteteve shqiptare dhe atyre spanjolle u finalizua, ku fokus i punës së agjentëve antidrogë ishte kontrolli i disa mjediseve për lëndë të forta narkotike.
Si pasojë, u kontrolluan disa vila dhe apartamente në Fushë Krujë dhe kryeqytet, në pronësi të një grupi të fuqishëm kriminal, që merret me trafikimi e lëndëve të forta narkotike nga Shqipëria drejt vendeve të Bashkimit Evropian, përfshi dhe Spanjën.
850 lëkurat e kriposura të gjedhit, në të cilat ishte fshehur kokainë, hetuesit shqiptarë në bashkëpunim me partnerët e huaj, e dinin shumë mirë se ishin ngarkuar në kontejnerë në vende të Amerikës Latine dhe do të vinin në rrugë detare në portin e Durrësit.
Bëhej fjalë për 48 ton, në dy ngarkesa, njëra në shtator dhe tjetra në nëntor, janë vëzhguar nga SPAK dhe janë lënë të veprojnë të lira deri në itinerarin e fundit, duke bërë të mundur me 10 arrestime në total./RTSH
