Inspektorati Policor i Kosovës ka konfirmuar se një pjesëtar i Policisë së Kosovës ka plagosur një 16- vjeçar me armë zjarr në fshatin Dubravë të Istogut.

Në njoftimin e tyre thuhet se ngjarja kishte ndodhur në shtëpinë e policit pas mesnate derisa theksohet se bëhet fjalë për një plagosje aksidentale.

“Hetuesit e IPK-së menjëherë i janë përgjigjur thirrjes kurse në vendin e ngjarjes kanë dalë edhe njësitet përkatëse policore si dhe prokurori kujdestar. Personi i plagosur në këtë rast (i moshës 16 vjeçare i cili ka lidhje familjare me policin) është dërguar me urgjencë për trajtim mjekësor fillimisht në Spitalin Rajonal të Pejës e pastaj është dërguar në QKUK në Prishtinë. Bazuar në hetimet preliminare fillestare dyshohet se rasti ka ndodhur në shtëpinë e zyrtarit policor i cili deri në këtë fazë të hetimit dyshohet se aksidentalisht ka shkrepur armën zyrtare”, thuhet në njoftim.

Derisa thuhet se polici tashmë është arrestuar dhe me vendim të prokurorit është ndaluar 48 – orë.

“Personi i dyshuar në këtë rast (zyrtari policor) është arrestuar nga Inspektorati Policor me dyshimin se i njëjti ka kryer veprën penale “vrasje e mbetur në tentativë” kurse me vendim të prokurorit të njëjtit i është caktuar masa e ndalimit për 48 orë si dhe është suspenduar nga detyra”, thuhet tutje./TelegramNews.com./

I mituri i plagosur me armë zjarri në Istog në gjendje të rëndë