Zëvendëskryeministri Besnik Bislimi ka reaguar ashpër ndaj kritikave të Bashkimit Evropian për aksionin e djeshëm në veri, ku mbyllja e pikave postare serbe është cilësuar si një veprim që dëmton procesin e dialogut.

Bislimi thekson se, pavarësisht se çështja e shërbimeve postare është diskutuar për të ardhmen në marrëveshjet e kaluara të viteve 2013 dhe 2015, kjo nuk justifikon vazhdimin e operimit ilegal të Postës së Serbisë në territorin e Kosovës, duke shkelur Kushtetutën e Republikës së Kosovës.

Bislimi kritikon BE-në për “gatishmërinë e saj më të lartë në dënimin e Kosovës dhe rikthimin prapa të procesit në çështjet e dialogut teknik”, duke kontribuar negativisht në përparimin drejt marrëveshjes finale. Ai shton se BE-ja duhet të mbështesë veprimet e Kosovës për mbrojtjen e sundimit të ligjit dhe konkurrencës, dhe të ndihmojë në eliminimin e aktivitetit ilegal në vend.

Pas informacionit të marrë nga Autoriteti Rregullativ i Komunikimeve Elektronike dhe Postare (ARKEP), Policia e Kosovës mbylli nëntë objekte të Postës së Serbisë në veri më 05.08.2024, pasi ky operativ po vepronte pa licencë dhe regjistrim në Agjencinë për Regjistrimin e Bizneseve në Kosovë (ARBK). Bislimi thekson se këto veprime janë në përputhje me mbrojtjen e ligjit dhe konkurrencës në treg.

Ai gjithashtu kritikon BE-në për fokusin e saj në dënimin e Kosovës dhe për mos adresimin e shkeljeve të Serbisë ndaj Marrëveshjes Bazike dhe Aneksit Implementues të Ohrit, si dhe deklaratave të vazhdueshme nga liderët serbë. Bislimi e përfundon duke thënë se dialogu në Bruksel duhet të përqëndrohet në çështjet thelbësore dhe shkeljet e Serbisë, dhe jo në ndëshkimin e Kosovës.