Para një dekade, në Beograd të Serbisë u mblodhën njëqind mijë njerëz, pas thirrjes së studentëve për protestë. Ndërsa në pritjen e Vitit të Ri 2025, e cila ishte unike në historinë botërore, protestuan disa dhjetëra mijëra qytetarë. Pritje në heshtje.
Për javë të tëra, ata që janë e ardhmja e Serbisë kanë bllokuar fakultetet e tyre, pavarësisht akuzave nga autoritetet se janë nën ndikimin e shërbimeve të huaja të inteligjencës, pavarësisht thirrjeve të BIA-s për biseda dhe kërcënimeve nga presidenti i shtetit, Aleksandar Vuçiq, i cili ka deklaruar se sigurimi i tij mund t’i largojë brenda disa sekondave, shkruan danas.rs.
Në mes të kësaj situate, ambasadori i Shteteve të Bashkuara të Amerikës në Serbi, Christopher Hill, deklaroi se Serbia po shkon në drejtimin e duhur dhe se çdo person në këtë vend ka një mundësi.
Këtë deklaratë e komentoi kreu i opozitës, Dragan Gjilas, kryetari i Partisë së Lirisë dhe Drejtësisë, duke pyetur ambasadorin amerikan “Çfarë mundësie, zoti Hill?”
“Mundësinë për t’u gjendur nën ndonjë strukturë që shembet nga korrupsioni, paaftësia dhe arroganca e një grupi kriminal të organizuar të udhëhequr nga Aleksandar Vuçiq? Askush në këtë vend, zoti ambasador, nuk ka as mundësi dhe as të drejtë për një jetë normale nëse nuk është anëtar i SNS-së. Të gjithë e dinë këtë. Edhe ju e dini, por flisni të kundërtën. A janë kontratat për ndërtimin e korridorit të Moravës nga kompania amerikane Bechtel me një kosto trefish më të lartë se ajo reale, marrëveshjet për centrale diellore me vlerë mbi një miliard euro me një kompani nga vendi juaj, dhe eksporti i municioneve në Ukrainë, arsye të mjaftueshme për të mbyllur sytë ndaj gjithçkaje që bën ky regjim kriminal?, tha Gjilas.
Ai shtoi se është e qartë që ambasadori mbron interesat e vendit të tij, gjë që është e drejtë.
“Por, për hir të Zotit, pse të mos heshtni të paktën, ashtu siç heshtni kur në praninë tuaj Aleksandar Vuçiq e quan opozitën gomarë? Pse thoni gjëra për të cilat e dini vetë se nuk janë të vërteta? A nuk dëgjoni kur presidenti i shtetit thotë se ka 17 mijë njerëz që janë betuar me gjak për të mbrojtur qëndrimin e tij në pushtet me çdo kusht? Krijimi i këtyre formacioneve paraushtarake është një kërcënim për lirinë dhe demokracinë, qoftë ata proamerikanë apo prorusë. Për ju, zoti ambasador, duhet të jetë shqetësim fakti që Vuçiq e pranon publikisht këtë”, tha ai.
Gjilas gjithashtu deklaroi se nuk është e vërtetë që mbështetja për Bashkimin Evropian po rritet në Serbi, por përkundrazi, ajo po bie për shkak të politikave të liderëve si Emmanuel Macron, Olaf Scholz dhe të tjerë, që sakrifikojnë vlerat evropiane për interesa personale.
Në fund, ai shprehu zhgënjimin ndaj ambasadorëve dhe politikanëve nga vendet me demokraci të zhvilluar që, sipas tij, nuk po mbështesin të njëjtat vlera për Serbinë.
“Dhe në fund, thoni se nuk e dini se ku do të jetoni këtë vit ju dhe bashkëshortja juaj, Julie, e cila, në një rol të paqartë, nganjëherë ka marrë pjesë në takimet që keni pasur dhe ka shprehur lëvdata për Aleksandar Vuçiqin, por Serbia do të mbetet në zemrën tuaj. Dikush dashakeq mund t’ju thoshte se Serbia është gjithashtu në xhepin tuaj, zoti ambasador. Unë nuk do ta bëj këtë. Do t’ju uroj që të kaloni ditët e pensionit me qetësi, duke parë se si në Serbi ndryshon pushteti dhe si Serbia më në fund fillon të ecë në drejtimin e duhur, duke arritur në çdo aspekt ato vende të cilave u kemi mbetur prapa për një kohë të gjatë”, përfundoi Dragan Gjilas.
Ndryshe, studentët dhe qytetarët po protestojnë tash e sa ditë pas tragjedisë në Novi Sad, kur u shemb streha e jashtme prej betonit e Stacionit Hekurodhor dhe shkaktoi vdekjen e 15 njerëzve.
