Shkak i aktit terrorist në Ibër-Lepenc, kryeministri Kurti, priti në takim ambasadorët e akredituar në Kosovë. Pas takimit, ambasadori amerikan theksoi se nuk mund ta thonë ende se kush qëndron pas këtij akti.
Ambasadorët e akredituar, me mëngjes i shkuan në takim kryeminstrit Kurti. Arsyeja ishte përditësimi me zhvillimet në Ibër – Lepenc.
Takimi ishte me dyer të mbyllura, e zgjati rreth një orë.
I pari nga takimi doli kryeministri Kurti.
Më pas edhe ambasadorët, ku ai i SHBA-së, Jeffry Hovenier iu drejtua mediave.
“Mendojmë se është e rëndësishme që ata që janë përgjegjës të identifikohen dhe të mbajnë përgjegjësi. Veprimet e dhunshme janë të pajustifikueshme. Qëndrojmë në gatishmëri të ndihmojmë popullin e Kosovës në këtë. E mirëpresim edhe mbështetjen e ofruar nga BE, EULEX, KFOR dhe të tjerët.”
Për ta, është herët të thuhet se kush qëndron pas sulmit terrorist në Ibër – Lepenc.
“Në këtë pikë, Shtetet e Bashkuara nuk janë në gjendje të thonë se kush qëndron prapa sulmit. Është herët për një gjë të tillë dhe këto gjëra kërkojnë hetim të kujdesshëm. Ajo që mund të them është se institucionet e Kosovës kanë mbështetjen tonë. Gjithashtu nuk jam në gjendje të përjashtoj asnjë grup, shtet apo ndonjë gjë tjetër. Është shumë herët, nuk e dimë ende”, ka deklaruar ambasadori amerikan.
Edhe zyra e Bashkimit Evropian, theksoi përkrahjen e ofruar për Kosovën.
“Kryeministri pati rastin të na informojë për zhvillimet mbrëmjen e së premtes. Pra, nga ana e Bashkimit Evropian, Përfaqësuesi i Lartë Borrell ka bërë një deklaratë me zë të lartë dhe të qartë, dhe unë nuk do ta përsëris”, ka deklaruar shefi i zyrës së BE-së, Avio Orav.
Detaje nga takimi me ambasadorët, dha zyra e Kryeministrit.
“Kurti i informoi diplomatët prezentë se Policia po i zhvillon hetimet, gjersa tashmë ka të arrestuar të dyshuar të ndërlidhur me sulmin e përgjegjës për ekzekutimin e tij, si dhe dëshmi e prova materiale, ndër to edhe armë, eksplozivë e uniforma dhe emblema të njësive ushtarake ruse. Kryeministri nënvizoi se kriminelët e terroristët do të përballen me drejtësinë, me fuqinë e ligjit të drejtë të Republikës demokratike e të pavarur të Kosovës. Më tej, foli edhe për rëndësinë e ekstradimit dhe arrestimit të kryekriminelit dhe kryeterroristit Millan Radoiçiq i cili vazhdon të jetë i lirë në Serbi, duke organizuar e planifikuar me mbështetjen edhe të Beogradit zyrtar dhe Presidentit Aleksandar Vuçiq, sulme në vazhdimësi ndaj Republikës së Kosovës”.
Përfaqësues edhe të shteteve tjera kanë dënuar aktin terrorist në Ibër Lepenc.
