Kreu i Lidhjes Demokratike të Kosovës (LDK), Lumir Abdixhiku, ka thënë se “Turneu i Ndryshimit” po vazhdon të dëshmojë momentumin e jashtëzakonshëm të partisë, si brenda ashtu edhe jashtë vendit.

Përmes një postimi në Facebook, Abdixhiku ka ndarë pamje nga tubimi i organizuar në Vjenë, ku, sipas tij, bashkatdhetarët u shfaqën me pjesëmarrje mbresëlënëse dhe entuziazëm të flaktë.

Ai e cilësoi këtë takim si dëshmi të përkushtimit dhe dashurisë së diasporës për Kosovën.

“Mbrëmje si kjo janë dëshmi se ndryshimi është afër, dhe se Lidhja jonë po forcohet çdo ditë e më shumë kudo që rreh zemra e atyre që ja duan të mirën atdheut,” ka shkruar Abdixhiku.

Ai theksoi rëndësinë e përbashkimit të qytetarëve të Kosovës, si brenda vendit ashtu edhe në diasporë, për të ndërtuar një të ardhme të drejtë, ku rinia ka mundësi për të realizuar ëndrrat dhe profesionistët ndihen të përmbushur.

“Jemi popull i vogël për të përjetuar kaq urrejtje, ndarje e përçarje. Jemi vend me shumë mundësi për të bërë të ardhmen tonë siç e meritojmë! Të barabartë mes kombeve evropiane! Do ta bëjmë!”, përfundoi Abdixhiku në Facebook.