Kremlini ka hedhur poshtë raportet e mediave që theksonin se gruaja e Bashar al Assad donte të divorcohej dhe të largohej nga Rusia.
Në fillim të këtij muaji, Assad, gruaja e tij Asma dhe anëtarët e familjes së tij mbërritën në kryeqytetin rus pasi u larguan nga Siria.
Vendndodhja e Asadit u konfirmua pasi agjencitë ruse të lajmeve thanë se Moska kishte arritur një marrëveshje me udhëheqësit e opozitës siriane.
Por ndërkohë, mediat turke dhe arabe raportuan se Asma al Assad kishte bërë kërkesë për divorc në Rusi.
I pyetur në një telefonatë nëse raportet për Asma al Assad korrespondojnë me realitetin, zëdhënësi i Kremlinit Dmitry Peskov ka thënë: “Jo, ato nuk korrespondojnë me realitetin”.
Ai hodhi poshtë gjithashtu raportet e mediave turke që sugjeronin se Assad ishte “mbyllur” në Moskë dhe se “asetet pronësore” të tij ishin ngrirë.
