Zëvendësdrejtori i Policisë për Rajonin e Veriut, Veton Elshani, ka konfirmuar suspendimin e dy policëve, për të cilët një qytetar i Mitrovicës së Veriut ka pretenduar se e kanë keqtrajtuar.
Suspendimi i tyre u rekomandua sot nga Inspektorati Policor i Kosovës.
“Duke ju referuar pretendimeve për keqtrajtim nga policia në Mitrovicën e Veriut lidhur me një incident në sheshin “Car Llazar” të datës 26 tetor 2024, hetuesit e IPK-së kanë rekomanduar sot suspendimin e dy zyrtarëve policorë (një rreshter dhe një zyrtar policor) të angazhuar në Drejtorinë Rajonale të Policisë në Mitrovicën e Veriut. Rekomandimi për suspendim është bërë në interest të hetimit me dyshimin se të njëjtit janë të përfshirë në keqtrajtimin e qytetarit në këtë rast”, është thënë në njoftimin e Inspektoratit.
Në fund të njoftimit thuhet se IPK do të ndërmerr edhe veprime të tjera hetimore në koordinim me prokurorinë kompetente për të sqaruar rrethanat e këtij rasti.
