Ish-kryeinspektori i AKI-së Burim Ramadani ka thënë se pjesëtarët e Forcës së Sigurisë së Kosovës po trajtohen pa dinjitet.
Madje sipas tij, të njëjtit për arsye të pagave po e lëshojnë ushtrinë, shkruan TelegramNews.
“Kur i bëmë ligjet për Ushtrinë, as në ëndrrën më të keqe nuk kishim parë se vjen një ditë kur ushtarët e Kosovës do të trajtohen kaq pa dinjitet. E për arsye të pagave do të lëshojnë ushtrinë. Shifrat e publikuara sot nga Ramush Haradinaj, atëherë Kryeministër dhe faktori kryesor vendimmarrës për bërjen e Ushtrisë, dëshmojnë emergjencën për të përmirësuar kushtet e Ushtrisë. Besoj se të gjithë duhet t’i bashkohemi thirrjes së tij për rininë e Kosovës që të bëhen ushtarë dhe për ushtarët të qëndrojnë në shërbim”, tha ai.
Ndryshe, Kryetari i Aleancës për Ardhmërinë e Kosovës, Ramush Haradinaj, ka thënë se mbi 11 për qind të ushtarëve janë larguar nga FSK në vitin 2023 dhe 2024.
Sipas të parit të AAK-së, kjo është alarmante, por që sipas tij kjo gjendje do të ndryshojë me ardhjen e tij në pushtet.
Madje ai premtoi se në muajt e pare të Qeverisë së re paga më e ulët në FSK do të jetë 1 mijë euro./TelegramNews./