Kreu i Aleancës për Ardhmërinë e Kosovës (AAK), Ramush Haradinaj në 26-të vjetorin e rënies heroike të Fehmi dhe Xhevë Lladrovcit ka thënë se janë shembull i idealit të luftëtarit të lirisë.
Haradinaj përmes një postimi në “Facebook” ka thënë se Fehmi dhe Xhevë Lladrovci kanë qëndruar të palëkundur në çdo sfidë të përbashkët.
“Fehmi dhe Xhevë Lladrovci, themeltarë të Ushtrisë Çlirimtare të Kosovës, janë shembull i pastër i idealit të luftëtarëve të lirisë. Ata u përballën bashkë me çdo sfidë, duke qëndruar të palëkundur deri në rënien e tyre heroike”, shkroi Haradinaj.
Tutje, kreu i AAK-së tha se ka pasur nderin që me Fehmiun dhe Xhevën të jenë pjesë e luftës.
“Pata nderin që me Fehmiun e Xhevën të jemi bashkë në shumë momente kyçe të luftës për lirinë e Atdheut. Një prej këtyre momenteve ishte beteja e Qafë Mullarit, në ditën që ra Luani. Fehmiu dhe Xheva vazhduan me guxim luftën çlirimtare, duke qenë shtyllë e saj deri në rënien heroike, në vendin e tyre të dashur, në Drenicë”, shkroi Haradinaj.
Haradinaj kujtoi edhe rënien në altarin e lirisë edhe Shefqet Zeka dhe Fatime Hetemi.
