Kryeministri i Kosovës, Albin Kurti gjatë një takimi me senatorin Chris Murphy, në margjina të Konventës Kombëtare Demokratike, ka kërkuar nga ShBA-të që ti bëj trysni Serbisë për dorëzimin e Milan Radoiçiqit.

Në komunikatën e lëshuar nga Zyra e Kryeministrit thuhet se Kurti ka nënvizuar se Serbia duhet të tërheqë letrën e dërguar drejt Bashkimit Evropian nga ana e ish-kryeministres Brnabiq dhjetorin e vitit të kaluar.

“Kryeministri Kurti nënvizoi se Serbia duhet të tërheqë letrën e dërguar drejt Bashkimit Evropian nga ana e ish-kryeministres Brnabiq dhjetorin e vitit të kaluar, përmes së cilës shprehet refuzimi dhe tërheqja nga marrëveshja nga ana e Serbisë. Serbia duhet të kthehet te marrëveshja dhe ta respektojë atë në mënyrë që e njëjta të zbatohet. Nuk ka zbatim të marrëveshjes sepse para së gjithash nuk po ka respektim të saj. Tash kur po bëhen 11 muaj të vrasjes së rreshterit tonë policor Afrim Bunjaku në Banjskë të Zveçanit, është koha e fundit që kryekrimineli Millan Radojçiq t’i dorëzohet autoriteteve të drejtësisë së Kosovës dhe për këtë Kryeministri Kurti kërkoi që ShBA-të të bëjnë trysni mbi Beogradin zyrtar”, thuhet në komunikatë.

Ndërkaq përgjatë këtij takimi u diskutua  edhe për dialogun e Kosovës me Serbinë, ku Kurti theksoi përkushtimin e Kosovës për zbatimin e Marrëveshjes Bazike dhe Aneksit Implementues të Ohrit.

“Në lidhje me dialogun me Serbinë, kryeministri Kurti theksoi përkushtimin e Kosovës në zbatimin në plotni të Marrëveshjes Bazike dhe Aneksit Implementues të Ohrit. Ai shtoi se për t’u zbatuar marrëveshja, nevojitet pranimi i saj edhe nga ana e Serbisë, duke e nënshkruar atë si dëshmi e garanci të angazhimit në zbatimin e marrëveshjes”, thuhet tutje në komunikatë. /TelegramNews/