Edhe pse pa ekonomi prodhuse, industriale, metalurgjike dhe  konkurente, Kosova vazhdon të mbijetojë  nga gjobat, tatimet dhe inkasimet  në sektorin privat dhe me tkurrjen e numrit të banorëve, Kosova rrezikon stabilitetin fiskal, meqë nuk ka ekonomi prodhuese si shtylla ekonomike.

“Kosova dhe Shqipëria, nuk  duhet të varen nga raportet dhe  inatet personale  Rama, Kurti”, ka  nënvizuar ish drejtuesi i Odës Ekonomike të Kosovës (OEK) dhe eksperti ekonomik  Safet Gërxhaliu, për gazetën TelegramNews.

Kryeministri Kurti jo rrallë ka anashkaluar selitë politike  shqiptare për qëndrime në Greqi, duke marrë kritika nga opozita dhe analistët dhe gjithë kjo presupozohet se ka ndodhur dhe vazhdon të ndodh për shkak të raporteve  të nivelit degradues mes dy kryeministrave Kosovë-Shqipëri.

Këtë tezë e mbështesin politologët dhe ekonomistët njëri ndër të cilët  Gërxhaliu  konstaton se “jemi dëshmitarë të raporteve të tensionuara  Rama- Kurti  në dy shtete  të një populli të ndarë që kanë krijuar ndjenjën e pasigurisë ekonomike që paraqesin Kosova dhe Shqipëria.

E para në ekonominë  minerare nëntokësore me potenciale  për zhvillim energjetik, e dyta  për turizëm  mbi nivelin evropian”, spikat Gërxhaliu duke shtuar se në nivel shtetesh po ndodh një distancë si shprehje e inateve politike.

Nënshkrimet  ndërqeveritare me shumë pak rezultate ekonomike

Në rrethana  normale, eksporti dhe importi Kosovë-Shqipëri do të duhej  zhvilluar mes dy firmave biznesore, e jo mes dy shteteve, konstaton ish kryetari i OEK-ut.

Ai thekson se Kosova dhe Shqipëria kanë organizuar shumë takime ndërqeveritare të cilat sipas protokollit do të ishte dashur të japin  efekte  ekonomike, por fazat implementuese, kanë degraduar shpesh nga sjelljet e politikave ditore për konsum të brendshëm.

“Nga Kosova në Shqipëri dhe anasjelltas, lajmi i mirë, nuk shihet  lajm dhe vetëm lajmi i keq përbën lajm dhe shpesh mirëpritet dhe promovohet”, vë në dukje Safet Gërxhaliu.

Aktualizimi i debatit për turizëm

Për shkak të aktualizimit të debatit për turizëm, një numër i konsiderueshëm kosovarësh nuk i kalojnë pushimet verore në Shqipëri.

Për dallim nga  vitet e kaluara kur bregdeti shqiptar ishte destinacion kryesor për kosovarët, këtë vit debati  i politizuar  ka krijuar plasaritje ndërkufitare në turizëm.

Për ta paraqitur  këtë sfidë si jo reale, kryeministri Rama është dashur të bëjë foto nga dritarja e improvizuar për ta paraqitur plazhin e Durrësit me laramani ombrellash në aludim se kosovarët janë  aty ku ishin zakonisht në pushime  verore.

“Ky debat sa tendencioz dhe i  politizuar po i dëmton raportet, më shumë se që po i konsolidon ato”, konstaton Gërxhaliu.

Kriza ekonomike në Kosovë detyron  qytetarët  të  marrin kredi për pushime verore

“Kriza ekonomike në Kosovë ballafaqon çdo ditë qytetarët    dhe bizneset me sfida mbijetese”, konstaton Gërxhaliu për të shtuar:

“Varfëria dhe  inflacioni i lartë kanë bërë që shumë qytetarë të hyjnë në kredi për të financuar pushimet verore.

Sipas statistikave bankare dhe institucioneve mikrofinanciare, shumica e qytetarëve po përballen me vështirësi ekonomike. Inflacioni dhe çmimet e larta  të produkteve bazë dhe mos rritja e  pagave kanë bërë që 50% e popullsisë as të mos mendojnë për pushime verore , gjë që nuk ka ndodhur në të kaluarën”, ka thënë Gërxhaliu.

Një shifër  e përafërt me realitetin kreditor për pushime flet  statistikisht  me shifra  për rritje kredi marrësish .

Rreth 200 mijë qytetarë llogariten se kanë marrë kredi  për pushime verore dhe këtë e dëshmojnë edhe statistikat e vitit të kaluar  kur  qytetarët e Kosovës  kanë marrë 4.7 miliardë euro kredi  bankare dhe 5.8 miliardë euro depozita./TelegramNews