Shefi i të ashtuquajturës Zyre për Kosovën në Qeverinë e Serbisë, Petar Petkoviq, tha se formimi i Asociacionit të komunave me shumicë serbe është rruga e vetme përpara për normalizimin e marrëdhënieve mes Kosovës dhe Serbisë.

Ai bëri këto komente në profilin e tij në Instagram pas një takimi me emisarin special të BE-së për dialogun Kosovë-Serbi, Miroslav Lajçak, në Beograd.

Petkoviq gjithashtu theksoi se ka biseduar me Lajçakun për situatën politike dhe të sigurisë në Kosovë, duke akuzuar kryeministrin Albin Kurti për veprime që ai i quajti të dëmshme për popullin serb. Ai gjithashtu shprehu vendosmërinë e Beogradit për të vazhduar dialogun dhe për të kërkuar zgjidhje të qëndrueshme në Kosovë përmes formimit të Bashkësisë së Komunave Serbe, siç është rënë dakord në Bruksel.